Wednesday, September 20, 2006
దేనివల్ల ఈ ముసలం ?
ప్రత్యేక తెలంగాణా గురించి చర్చలు జరుగుతున్న రోజులివి.ముగిసిపోయిందనుకున్న ఒక వేర్పాటువాద అధ్యాయం మళ్ళీ 30 ఏళ్ళ తరువాత తెరుచుకోవడం పట్ల చాలామంది ఆవేదన వ్యక్తం చేస్తున్నారు.కాని ప్రస్తుతం ప్రచారమౌతున్న తెలంగాణావాదం 1969-71ప్రాంతాలతో పోలిస్తే మరీ అంత చెడ్డది కాదని అందరూ ఒప్పుకోవాలి.పాపం !ప్రస్తుత తెలంగాణావాదులు అహింసామార్గంలోనే ప్రజాస్వామికంగా ప్రత్యేక రాష్ట్రాన్ని సాధించుకోవాలని కృషిచేస్తున్నారు.
దానికీ జ్యోతిశ్శాస్త్రానికీ సంబంధమేంటి ?అని మీరు అడుగుతారు. అదే చెప్పాలనుకుంటున్నాను. కేసీయార్గారు అన్న ఒక మాట మాత్రం నిజం."ప్రత్యేక తెలంగాణా కోసం ఉద్యమించకుండా తెలంగాణావారిని ఎవరూ ఆపలేరు.కేసీయార్ కాకపోతే మరో పీసీయార్ వచ్చి ఉండేవాడు."గ్రహస్థితి నిజంగా అలాగే ఉంది.అయితే గ్రహస్థితులన్నీ తాత్కాలికమేనని మర్చిపోకూడదు.
ముందు ఆంధ్రప్రదేశ్ రాష్ట్ర జాతకం పరిశీలిద్దాం.
ఆంధ్రప్రదేశ్ జన్మలగ్నం మీనం. లగ్నాధిపతి అయిన గురుడు లగ్నం నుంచి ఏడో ఇల్లయిన కన్యలో నీచపడ్డ శుక్రుడి (తృతీయాధిపతి అన్నదమ్ములకి కారకుడు)తో కలిసి తృతీయ స్థానమైన వృషభాన్ని చూస్తున్నాడు.ఇది అన్నదమ్ముల మధ్య తీవ్రమైన అభిప్రాయభేదాలకి దారి తీసే గ్రహస్థితి.అందుచేత ప్రతి పది ఇరవై ఏళ్ళకి ఒకసారి తెలుగువారు ఇలా దెబ్బలాడుతూనే ఉంటారు."రాష్ట్రం ముక్కలవుతుందేమో ! " అని ఎప్పటికప్పుడు అనిపిస్తుంది. కాని ఎప్పటికీ ముక్కలు కాదు.ఎందుకంటే లగ్నాధిపతి అయిన గురుడు మూడో దృష్టితో తన స్వంతరాశి(మీనం) అయిన లగ్నాన్ని కూడా చూస్తున్నాడు.ఎవరి లగ్నం మీదైనా గురుదృష్టి పడిందంటే వారు విపరీతంగా లావెక్కుతారు.అలాగే ఆంధ్రప్రదేశ్ కూడా ఇలా ఎప్పటికీ లావుగానే (పెద్ద రాష్ట్రంగానే) ఉంటుంది కాని చిన్న రాష్ట్రాలుగా ముక్కలవ్వడం మాత్రం జరగదు.ఒకవేళ ప్రత్యేక తెలంగాణా ఇచ్చినా కూడా అది అలా ఎక్కువ కాలం కొనసాగదు.మళ్ళీ తొందరగానే ఆంధ్రప్రదేశ్లో విలీనమౌతుంది.
జాతకచక్రం కాకుండా కాలచక్రాన్ని పరిగణనలోకి తీసుకున్నప్పుడు కాలచక్రంలో ప్రస్తుతం మీనరాశి దశ నడుస్తోంది.ఇది 1981 లో మొదలై 2016 దాకా నడుస్తుంది. మీనరాశికి అధిపతి అయిన గురుడే ఆంధ్రప్రదేశ్కి లగ్నాధిపతి.ఈ గురుగ్రహం (Jupiter)సాక్షాత్తు భగవంతుడితో సమానంగా పరిగణించబడుతోంది.గురుడు బ్రాహ్మణ గ్రహం. విద్యలకి అధిపతి దొంగతనాలకి ప్రేరకుడు. శాంత స్వభావుడు. నెమ్మది గలవాడు. కాని వాగ్వాదాలంటే చెవి కోసుకుంటాడు. భోజనప్రియుడు. స్థూలకాయుడు. బంగారు మేనిచాయ గలవాడు. అందుచేత ఆయనకి పసుప్పచ్చ అత్యంత ప్రీతిపాత్రం.
1981నుంచి రాష్ట్రంలో జరుగుతూ వచ్చిన పరిణామాలన్నీ గురు గ్రహ ప్రభావం చేతనే.ఎందుకంటే తన లగ్నంలో జన్మించిన వారికి ఏ గ్రహమైనా తన దశలో భారీ లాభాలు చేకూరుస్తుంది.అందువల్ల 1983లో తెలుగుజాతి ఆత్మగౌరవ నినాదంతో ఒక పసుప్పచ్చ పార్టీ అధికారంలోకి వచ్చింది.దానితో తెలుగువారికిష్టం లేని "మద్రాసీ" అనే బిరుదు కాలగర్భంలో కలిసింది.ఈ మీనరాశి దశలో ఆంధ్ర ప్రభుత్వానికి అంతకుముందు సంప్రదాయంలా మారిపోయిన రాజకీయ అస్థిరత్వానికి తెరపడింది.తరువాత అరుదైన గ్యాస్ పెట్రోలియం యురేనియం నిక్షేపాలు ఆంధ్రాలో బయట పడ్డాయి. విద్యలకి ఆంధ్రా ప్రధాన కేంద్రమైంది.విశ్వ విద్యాలయాలు ఇబ్బడి ముబ్బడిగా పెరిగాయి. ఇది ఎంత స్థాయిలో జరిగిందంటే BITS, Pilani లో 80 శాతం మంది విద్యార్థులు తెలుగువారే అయ్యేంతగా. 4,600 IIT సీట్లలో 800 పైగా ఆంధ్రా విద్యార్థులే సాధించుకునేంతగా.విమానాశ్రయాలు కూడా పెరిగాయి.అలానే తెలుగు క్రీడాకారులకి అంతర్జాతీయ గుర్తింపు లభించడం ప్రారంభమైంది.తెలుగు సినిమాలు ఆంధ్రా దాటి ఖండాంతరాల్లో వందలాది థియేటర్లలో విడుదలవ్వడం మామూలైంది.అంతకంటే ముఖ్యమైన విషయం-గురుగ్రహ ప్రభావం చేత 1981నుంచి ఆంధ్రులంతా గురు (షిరిడీ సాయిబాబా)భక్తులుగా మారిపోయారు.
శనిలాగా గురుడు కూడా తన దశ యొక్క ఆఖరి సంవత్సరాల్లో ఎక్కువ ఫలితాలిస్తాడు.కనుక ఈ పురోగమనం 2010 నుంచి ఇంకా ఇంకా విజృంభిస్తుంది.
కాని ఆ కాలంలో కొన్ని బాధాకరమైన సంఘటనలు జరుగుతాయి.మనం మానసికంగా సిద్ధపడి ఉండాలి.విశాలహృదయులు ఆవేదనకి లోనౌతారు.తమిళనాడులాగా ఆంధ్రప్రదేశ్ తెలుగు భాషా దురభిమానులతో నిండిపోతుంది.ఆంధ్రప్రదేశ్ ప్రభుత్వ వ్యవస్థ కూడా బాగా మారిపోయే అవకాశం ఉంది.గవర్నరు ముఖ్యమంత్రి మొదలైన పదవులు (designations) పరిణామం చెందుతాయి.
ప్రస్తుతానికి ఇంతకంటే ఎక్కువ చెప్పడం కుదరదు.
Friday, September 08, 2006
ఏలినాటి శని అంటే ఏంటి ?
'ఏలినాటి శని ' అనే మాట మనం తరచుగా వింటూ ఉంటాం. శనికి బాగా చెడ్డపేరు తెచ్చిపెట్టిన గోచార దశల్లో ఇది చాలా ప్రముఖమైనది. ఏలినాటి శనిదశ ఏడున్నరేళ్ళ పాటు ఉంటుందనే విషయం మాత్రం కొంతమంది పెద్దవారికి తెలుసు. ఆ గోచార కాలంలో మనిషి అనేక కష్టాలు ఎదుర్కోవాల్సి వస్తుందని కూడా పాతకాలం వారికి తెలుసు.ఏలినాటి శని అందరికీ కష్టకాలంగానే పరిణమించనక్కర్లేదని జ్యోతిష్కులకి మాత్రమే తెలుసు.
ఏలినాటి శని అంటే ఏమిటి ? అది ప్రతి మనిషికీ ఎందుకు అనుభవంలోకొస్తుంది ? అనేది అర్థంకావాలంటే ముందు జ్యోతిశ్శాస్త్రంలో కొన్ని ప్రాథమిక విషయాలు తెలియాలి. అవి వివరించడం కోసమే ఈ పోస్టు కేటాయిస్తున్నాను. కాని ఇక్కడ లోతైన సాంకేతిక వివరాల (deep technical details) జోలికి వెళ్ళడం లేదు.అవి తెలుసుకోవాలంటే జ్యోతిశ్శాస్త్రానికి సంబంధించిన ప్రామాణిక రచనల (standard works)ని సంప్రదించాల్సి ఉంటుంది.
'జాతకం ఉండగా మళ్ళీ ఈ గోచారం ఏంటి ?' అని సందేహం కలుగుతుంది సామాన్యులకి. గోచారమన్నా, గ్రహచారమన్నా ఒకటే. 'చారం' అంటే సంచరించడం. గ్రహాలు ప్రస్తుతం ఏఏ రాశుల్లో సంచరిస్తున్నాయో తెలిపేది గ్రహచారం. ఏలినాటి శని అనేది గ్రహచారానికి సంబంధించిన దృగ్విషయం (phenomenon). జాతకం ఎప్పుడో తీసిన ఫోటో లాంటిది కాగా, గోచారం live video లాంటిది. అందుకే జాతకంలో గ్రహాలు కదలవు. జాతకుడు పుట్టేనాటికి అవి ఏఏ రాశుల్లో ఉన్నట్లు జాతక చక్రంలో నమోదు చెయ్యబడ్డాయో అవే రాశుల్లో ఉండి జీవితాంతమూ మన మీద ప్రభావం చూపుతాయి. అంటే జాతకంలో మారేదేమీ ఉండదు. ఆ చక్రం మనకి దేవుడు స్వహస్తంతో రాసిన తలరాత అన్నమాట. అది ఒక మనిషి యొక్క యావజ్జీవితానికీ వెయ్యబడ్డ program
ఏలినాటి శనిదశ గోచార వశాన ప్రస్తుతం శని మన జాతకంలో ఏఏ రాశుల్లో సంచరిస్తున్నాడనే దాన్ని బట్టిఏర్పడుతుంది.శనిగ్రహం చంద్రలగ్నం నుంచి 12వ, 1వ, 2వ స్థానాల్లో వరసగా సంచరించే కాలాన్ని ఏలినాటి శనిదశ అంటారు. ఇది ఏడున్నర సంవత్సరాల పాటు జరుగుతుంది. ఎందుకంటే, శని ఒక్కొక్క రాశిలో రెండున్నర సంవత్సరాలుంటాడు. చంద్రుడున్న స్థానాన్ని కూడా కలుపుకుని ఈ స్థానాల్ని లెక్కిస్తారు.(Both ends inclusive).
చంద్రలగ్నం అంటే ఏంటి ? (పైన ఇచ్చిన చక్రాల్ని పరిశీలించండి) జాతకుడు పుట్టినప్పుడు చంద్రుడు ఏ స్థానంలో/రాశిలో ఉంటాడో అదే చంద్రలగ్నం. పైన ఇచ్చిన చక్రాల్లో చంద్రుడు మొదటి స్థానంలో మేషరాశిలో ఉన్నాడు. (మన ప్రస్తావనకి అవసరం లేదు గనుక మిగతా గ్రహాల స్థితి సూచించబడలేదు)ఆ వ్యక్తి జాతకానికి అదే చంద్రలగ్నం. అప్పుడు 12వ స్థానమైన మీనరాశిలోను, 1వ స్థానమైన మేషరాశిలోను, 2వ స్థానమైన వృషభ రాశిలోను శని సంచరిస్తే అప్పుడు సదరు వ్యక్తికి ఏలినాటి శని జరుగుతుంది. మనిషికో చంద్రలగ్నం ఉంటుంది గనుక అందరికీ ఒకేసారి ఏలినాటి శని రాదు.
పైన రెండు రకాల చక్రాలిచ్చాను. మొదటిది సవ్య చక్రం. దీంట్లోని రాశుల్నీ, స్థానాల్నీ ప్రదక్షిణ క్రమం (clock-wise)లో లెక్కించాలి. ఇది ఆంధ్రదేశమంతటా వాడుకలో ఉంది. రెండోది అపసవ్య చక్రం. దీంట్లోని రాశుల్నీ, స్థానాల్నీ అప్రదక్షిణ క్రమం (anti-clock-wise)లో లెక్కించాలి. ఇది కళింగాంధ్రా (అంటే తూర్పు గోదావరి, విశాఖపట్నం,విజయనగరం, శ్రీకాకుళం, గంజాం, బరంపురం జిల్లాల)లో వాడుకలో ఉంది. ఉపయోగపడే విషయంలో మాత్రం రెండూ సమానమే. ఎవరి అలవాటుని బట్టి వారు పై విధంగా జాతకాలు రాస్తూంటారు.
శని శుభాశుభాలు - 1
శని పేరెత్తితే చాలామందికి భయం. ఇబ్బందిపెట్టేవారిని "శనిగాడు" అని దూషించడం కూడా కద్దు."మీకు ప్రస్తుతం శని జరుగుతోంది."అని జ్యోతిష్కుడు అన్నాడో లేదో జాతకుడికి గుండెల్లో రైళ్ళు పరిగెడతాయి. నిజానికి శని అంత భయంకరమైన గ్రహమేమీ కాదు. శనే కాదు, ఏ గ్రహమైనా ఆ జాతకానికి ఎన్నో అధిపతి ? ఎక్కడ ఉన్నాడు ? అనేదానిమీదే శుభాశుభాలు ఆధారపడి ఉంటాయి.
శని కొన్ని జాతకాలకి చాలా మేలు చేస్తాడు. ఉదాహరణకి మెగాస్టార్ చిరంజీవి గారి జాతకం తీసుకుంటే అందులో శని తులారాశిలో మహోచ్ఛంలో ఉన్నాడు. అందువల్ల ఆయనకి తిరుగులేని ప్రజాదరణ, దిగంత విశ్రాంత కీర్తి ప్రతిష్ఠలు లభించాయి. శని ఆ స్థితిలో ఎవరి జాతకంలో ఉన్నప్పటికీ వారి చుట్టూ అలా ఒక సమ్మోహన వలయం ఏర్పడుతుంది.అయితే వారు ఏ రంగంలో తమ ప్రాభవం (domination) వెలిగిస్తారనేది మిగతా గ్రహాల్ని బట్టి చెప్పాలి. విదేశయానంలో శని పాత్ర కాదనలేనిది. అలాగే ఆయుర్దాయానికి సైతం శనిస్థితి చాలా ముఖ్యం. వివాహం కూడా సాధారణంగా శనిగోచారంలోనో, శని యొక్క దశా-అంతర్దశల్లోనో సంభవించడం మనం గమనిస్తాం. శని అనుగ్రహం పొందినవారికి ఆయన వందలాది, వేలాదిమంది సేవకుల్ని, ఉద్యోగుల్ని సమకూర్చి పెడతాడు.మనం చూసే మెగా కార్పొరేషన్లని స్థాపించిన పారిశ్రామికవేత్తల జాతకాల్లో శని అత్యుత్తమస్థితిలో ఉండడం కనిపిస్తుంది.
శని కొన్ని జాతకాలకి చాలా మేలు చేస్తాడు. ఉదాహరణకి మెగాస్టార్ చిరంజీవి గారి జాతకం తీసుకుంటే అందులో శని తులారాశిలో మహోచ్ఛంలో ఉన్నాడు. అందువల్ల ఆయనకి తిరుగులేని ప్రజాదరణ, దిగంత విశ్రాంత కీర్తి ప్రతిష్ఠలు లభించాయి. శని ఆ స్థితిలో ఎవరి జాతకంలో ఉన్నప్పటికీ వారి చుట్టూ అలా ఒక సమ్మోహన వలయం ఏర్పడుతుంది.అయితే వారు ఏ రంగంలో తమ ప్రాభవం (domination) వెలిగిస్తారనేది మిగతా గ్రహాల్ని బట్టి చెప్పాలి. విదేశయానంలో శని పాత్ర కాదనలేనిది. అలాగే ఆయుర్దాయానికి సైతం శనిస్థితి చాలా ముఖ్యం. వివాహం కూడా సాధారణంగా శనిగోచారంలోనో, శని యొక్క దశా-అంతర్దశల్లోనో సంభవించడం మనం గమనిస్తాం. శని అనుగ్రహం పొందినవారికి ఆయన వందలాది, వేలాదిమంది సేవకుల్ని, ఉద్యోగుల్ని సమకూర్చి పెడతాడు.మనం చూసే మెగా కార్పొరేషన్లని స్థాపించిన పారిశ్రామికవేత్తల జాతకాల్లో శని అత్యుత్తమస్థితిలో ఉండడం కనిపిస్తుంది.
శని సూర్యుడి నుంచి 142 కోట్ల 70 లక్షల కిలోమీటర్ల దూరంలో ఉన్న గ్రహం. మన ప్రాచీన గ్రంథాల్లో దాన్ని "వాయుతత్త్వ గ్రహం" అని పేర్కొనగా, ఆధునిక ఖగోళ శాస్త్రవేత్తలు Gas giant అంటున్నారు. అంటే భూమిలో లాగా శనిలో మట్టీ, శిలలూ లేవట. 99 శాతం వాయువులే (gases) ఉన్నాయట. దీని వ్యాసం చుట్టుకొలత లక్షా 20 వేల కిలోమీటర్లు.ఇది భూమికంటే 736 రెట్లు పెద్దది. బరువులో మాత్రం 94 రెట్లే పెద్దది. శని చుట్టూ అంతుపట్టని రంగురంగుల వలయాలు ఉండడం చేత ఆయనకి Lord of rings అనే ముద్దుపేరు కూడా ఉంది.
మన పురాణాల ప్రకారం- శని సూర్యుడికీ, ఆయన చిన్న భార్య అయిన ఛాయాదేవికీ జన్మించినవాడు. (పెద్ద భార్య ఎవరు ? ఎందువల్ల సూర్యుడు ఛాయాదేవిని చేసుకోవాల్సి వచ్చింది ? అంటే అదో పెద్ద కథ)అంటే యమధర్మరాజుకి స్వయానా సోదరుడు. యముడు కర్తవ్యపాలనా నిష్ఠకి ప్రతీక కాగా, శని శ్రమజీవనానికి అధిపతి. అందుచేత శనికి కార్మిక, కూలీ వర్గాల పట్ల పక్షపాతం ఎక్కువ. ఆ కారణం వల్ల మన పూర్వీకులు శనిని శూద్రగ్రహంగా పరిగణించారు. శూద్రుడు కావడం చేత శని ఒంటిరంగు నలుపు. నలుపంటే మరీ కారునలుపు కాదు, కొంచెం నీలం కలిసిన నలుపు. తాను స్వయంగా నీలి-నలుపు కావడాన శనికి ఆ రంగులు గలవన్నీ చాలా ఇష్టం. ఇంద్రనీలమణి, నల్లబట్టలు, నీలం బట్టలు, నల్ల నువ్వులు, తుప్పుపట్టని ఇనుము, చీకటి, నల్లని మనుషులు, నల్లరాళ్ళూ వగైరా ! సూర్యుడు కాల స్వరూపుడు, యముడు మృత్యుదేవత కాగా శని ఆయుర్దాయ దేవత.(అవస్థాభేదాలే తప్ప, నిజానికి ఇవన్నీ ఒకటే నని గ్రహించాలి)
'శనికి ఒక కాలు కుంటి' అని మన పూర్వీకుల అభిప్రాయం. (సౌరి శ్శనైశ్చరో మందః) అందుకనే ఆయన అతినెమ్మదిగా సూర్యుడి చుట్టూ ప్రదక్షిణం చేస్తాడట.దానివల్ల ఆయన యొక్క మహాదశాకాలం (20 సంవత్సరాల శుక్రుడు తప్ప)మిగతా అన్ని గ్రహాల దశాకాలాల కంటే బహుదీర్ఘమైనది (19 సంవత్సరాలు). సూర్యుడిది 6 సంవత్సరాలు, చంద్రుడిది 10 సంవత్సరాలు, కుజుడిది 7 సంవత్సరాలు మాత్రమే.శనికున్న లక్షణాల్లో ఈ మందత్వం (నెమ్మదితనం) చాలా ప్రధానమైనది. శని ప్రభావం జాతకాల్లో అమితంగా ఉన్నప్పుడు దీనిమూలంగా నీరసం, నిరాశ, సోమరితనం, మందకొడితనం, బద్ధకం, ఏం చెప్పినా తొందరగా గ్రహించలేకపోవడం, ఒక పని చేసేటప్పుడు తీసుకోవాల్సినదానికంటే రెట్టింపు సమయం తీసుకోవడం జరుగుతుంది. మందుడు కావడం మూలాన శని కూడా తానిచ్చే ముఖ్యమైన శుభాశుభ ఫలితాలన్నీ తన దశ చివర్లోనే ఇస్తూంటాడు. ఈ లక్షణం బృహస్పతికి కూడా ఉంది. కాని ఇక్కడ ఒక విశేషం చెప్పుకోవాలి. "Saturn may delay, but will not deny." అంటారు పెద్దలు. అంటే శని శుభ ఫలితాలివ్వడానికి ఆలస్యం చేస్తాడు, కాని అసలు ఇవ్వకుండా ఎగ్గొట్టడు. "కుంటి కులాసం ఇంటికి మోసం" అనే సామెత చొప్పున శనికీ, ఆయన తండ్రి అయిన సూర్యుడికీ ఎందుకో గాని బద్ధశత్రుత్వం ఉంది.అందువల్లనే శనిరాశులైన మకర కుంభాల్లో జన్మించినవారికి కూడా తమ తల్లిదండ్రులతో పడదని జ్యోతిష్కులంటారు.
శని శుభాశుభాలు - 2
శని స్వరూపం : శనిని మన పూర్వగ్రంథాల్లో 90 ఏళ్ళ వృద్ధుడుగా వర్ణించారు.అంటే ఆయన ఎల్లప్పుడూ అదే వయసులో కనపడతాడట. ఆయన నపుంసకుడు. అంటే స్త్రీ కాదు. పురుషుడూ కాదు. ఆయన నల్లగా సన్నగా పొడవుగా ఎముకలపోగులా, నరాల కట్టలా ఉంటాడట. ఒంటినిండా నూనె పూసుకుని, నల్లని బట్టలు, ఇనప కిరీటం, అలాగే ఇనప ఆభరణాలు ధరించి, చేత్తో చీపురుకట్ట పట్టుకుని తన ప్రియమైన కాకి వాహనం ఎక్కి సూర్యుడి చుట్టూ ప్రదక్షిణం చేస్తాడట. చెట్లని ఎండించి మోడుబార్చే ఆకురాలు కాలం (శిశిరఋతువు) ఆయనకి చాలా ప్రియమైనది. ఆయనకి అత్యంత ఇష్టమైన రుచి వగరు. మరుగుదొడ్లు, మురికి గుంటలు, కనీస వసతులు లేని గ్రామాలు శ్మశానాలు, పెంటకుప్పలు, పాడుపడ్డ భవనాలు, పనికిరాని వస్తువులు దాచుకునే చోట్లు శనికి ప్రీతిపాత్రమైన నివాసస్థానాలు. ఆయన సంపూర్ణ పాపగ్రహం, సంపూర్ణ క్రూరగ్రహం కూడా !అయితే ఇందాకనే చెప్పుకున్నట్లు ఈ పాపత్వానికి, క్రూరత్వానికీ చాలా పరిమితులున్నాయి.
శని ఆధిపత్యం వహించే విషయాలు : శనికి సంబంధించిన సంఖ్య 8 (ఎనిమిది). శని లక్షణాలే గల రాహువు యొక్క సంఖ్య (4-నాలుగు)కి ఇది రెట్టింపు. అందుచేత ఈ రెండు పాపగ్రహాల సంఖ్యలూ దొంగలకి అత్యంత అనుకూలమైనటువంటివి. ఈ సంఖ్యలు వచ్చే రోజుల్లో దొంగతనాలు విజయవంతంగా జరగడం మనం గమనిస్తాం. అంటే ఏ నెలలో అయినా 4, 8, 13, 17, 22, 26, 31 తేదీలన్నమాట. అందులోను ఆ దొంగల అదృష్టసంఖ్యలు కూడా 4 లేక 8 అయితే ఇంక పట్టశక్యం కాదు.
శని మానవజీవితంలో చాలా విషయాల్ని అదుపుచేస్తూంటాడు.
శని కారకుడైన శరీర స్థితులు : రోగిష్టితనం, కష్టాలు, డిప్రెషన్, వికార రూపం, నపుంసకులు, వికారమైన దుస్తులు, వికారమైన వేషం, కుంటితనం, అవిటితనం, వాతరోగాలు, పక్షవాతం, కేన్సరు, బోదకాలు, కురుపులు, మూర్ఛ.
శని కారకుడైన శరీర భాగాలు : ఎముకలు, పళ్ళు, గోళ్ళు, వెంట్రుకలు, ప్రేగులు.
శని కారకుడైన స్వభావాలు, అలవాట్లు : ఆచారహీనత్వం, అబద్ధాలు, పౌరుషం లేకపోవడం, మూర్ఖత్వం, చెడు స్నేహాలు, నలుపు, పాపాలు, క్రూరత్వం, జూదం, మద్యపానం, పిచ్చి, ఆలస్యం, అశుచిగా మురిగ్గా బ్రతకడం, క్షుద్ర దేవతోపాసన, వెంకటేశ్వర భక్తి, హనుమద్భక్తి, తమోగుణం.
శని కారకుడైన జాతులు : అడవిమనుషులు, శూద్రకులాలు, సేవకులు, నీచులు.
శని కారకుడైన జంతువులు, పక్షులు : గాడిదలు, దున్నపోతులు, కాకులు
శని కారకుడైన పదార్థాలు : బూడిద, ఇనుము, నువ్వులు, నూనెలు, ఉప్పు , ఉల్లి, వేరుసెనగ, దుంపల జాతులు, పెట్రోలు, కిరోసిన్, బొగ్గు, తారు, గనులు త్రవ్వే సాధనాలు,
శని కారకుడైన వృత్తులు : శ్రమ, బానిసత్వం, ముళ్ళురాళ్ళు గల ప్రదేశాల్లో సంచారం, రికామీ జీవితం (jobless life), ఇనుము, సీసము, పక్షులు, పశువులు, రాగులు, జొన్నలు, మినుములు, మత్తుపదార్థములు మొ.అమ్మిజీవించడం, నల్లబజారులో వస్తువులమ్మి జీవించడం, కూలీల్ని మోసం చేసి జీవించడం, , తోళ్ళ పరిశ్రమలు, రహస్యాలు, కుట్రలు, విషప్రయోగాలు, సేవకవృత్తి (ఒకరి కింద జీతం తీసుకుని పనిచెయ్యడం), పురాతన వస్తువులు త్రవ్వి తీయడం (ఆర్కియాలజి).
శని కారకుడైన సంఘటనలు : బీభత్సాలు, అయోగ్యురాలి కడుపున పుట్టడం, విఘ్నాలు, దరిద్రం, రాళ్ళదెబ్బలు, భార్యాబిడ్డలచేత తిరస్కరించబడడం, పిశాచబాధ.
శని దిక్కు : పడమటి దిక్కు
శని కారకుడైన ప్రదేశాలు : నూనెమిల్లులు, ఐస్ఫ్యాక్టరీలు , సొరంగాలు, గుహలు.
శని సాధారణంగా పై విషయాలకి కారకుడైనప్పటికీ, జాతకంలో లగ్నం నుంచి 1,4,7,10 స్థానాలకి ఆధిపత్యం వహిస్తూ, అదే సమయంలో మంచి రాశుల్లో ఉన్నట్లయితే, పై వాటికి పూర్తిగా విరుద్ధమైన శుభఫలితాలిస్తాడని గుర్తుంచుకోవాలి.
Sunday, August 27, 2006
ఈ బ్లాగు ఉద్దేశం హిందూ వాస్తు, జ్యోతిష విషయాలు తెలియజెయ్యాలని. అలాగే నా దృష్టికి వచ్చిన కొన్ని ఆసక్తికరమైన కేసుల గురించి కూడా వ్యాసాలు పోస్టు చేద్దామనుకుంటున్నాను.
